शिवसेनेने रद्द केलेला सावरकरांचा कार्यक्रम
भाजप ठाण्यात घेणार : निरंजन डावखरे
मराठी भाषादिनी डॉ. घाणेकर नाट्यगृहात `अथांग सावरकर'
ठाणे -
शिवसेनाप्रणित स्थानिय लोकाधिकार समिती महासंघाने प्रभादेवी येथील रवींद्र नाट्यगृहात `अथांग सावरकर' कार्यक्रमाचे आयोजन केले होते. मात्र, महासंघाच्या पदाधिकाऱ्यांची मनोरंजनात्मक कार्यक्रमाची इच्छा असल्यामुळे शिवसेनेने कार्यक्रम रद्द केला. तसेच शिवसेना उपनेते असलेल्या अभिनेते शरद पोंक्षे यांना पत्र पाठवून कार्यक्रम रद्द करण्यात आले असल्याचे कळविले होते.
ठाण्यात भाजपतर्फे मराठी भाषा दिन साजरा करण्यात येतो. या कार्यक्रमातच भाजपचे शहराध्यक्ष व आमदार निरंजन डावखरे यांनी `अथांग सावरकर' कार्यक्रम आयोजित करण्याचा निर्णय घेतला. डॉ. काशिनाथ घाणेकर नाट्यगृहात २७ फेब्रुवारी रोजी सायंकाळी सात वाजता कार्यक्रमाला सुरुवात होईल. या कार्यक्रमाला ठाणेकर नागरिकांबरोबरच सावरकरप्रेमींनी मोठ्या संख्येने उपस्थित राहून स्वातंत्र्यवीर विनायक दामोदर सावरकर यांचे जाज्वल्य विचार आत्मसात करावेत, असे आवाहन आमदार निरंजन डावखरे यांनी केले आहे.
कॉंग्रेसमुळे शिवसेनेकडून
सावरकरांचा कार्यक्रम रद्द : डावखरे
स्वातंत्र्यवीर विनायक दामोदर सावरकर यांच्यावरील शिवसेनेचे प्रेम हे बेगडी आहे. `शिवसेनेचे दाखवायचे दात व खायचे दात वेगवेगळे असून, आम्ही हिंदूत्ववादी असल्याचा पोकळ आव आणला जात आहे. महाविकास आघाडीच्या किमान समान कार्यक्रमामुळे व कॉंग्रेसच्या संभाव्य आक्षेपाच्या भीतीमुळे शिवसेनेला सावरकरांपासून दूर राहावे लागत आहे. त्यामुळे करमणुकीचे कारण दाखवून `अथांग सावरकर' कार्यक्रम रद्द करण्यात आला, अशी कठोर टीका आमदार निरंजन डावखरे यांनी केली. स्वातंत्र्यवीर सावरकरांचे प्रखर विचार असलेला `अथांग सावरकर' व मनोरंजनात्मक कार्यक्रम यांची शिवसेनेने केलेली तुलना ही अपमानास्पद आहे. त्याचा प्रत्येक सावरकरप्रेमी निषेध करीत आहे. सावरकरांबाबत कोणतीही तडजोड करणार नाही, असे छातीठोकपणे सांगणाऱ्या शिवसेनेकडून सावरकरांच्या विचारांचा प्रसार करणारा `अथांग सावरकर' कार्यक्रम रद्द होतो, यावरुन शिवसेनेचे `खरे' सावरकरप्रेम दिसून येते, असे निरंजन डावखरे यांनी सांगितले.
